Kan mens ooit genoeg piesangbroodresepte hê! Resepte wat vinnig en ongekompliseerd is, met ‘n ‘gebruik-wat-jy-het-uitkyk’.
Die geur van piesangbrood in die oond is een van die gerusstellende dinge van ‘n doodgewone lewe. Wie sou voorsien dat hierdie alledaagse gebak in die herfs van 2020 deel sal word van ‘n bak-fenomeen waarmee mense ontvlugting en geborgenheid sou soek in die Corona-pandemie, asof die houtlepel ‘n towerstok is met magiese kragte en die ritueel van piesang fyndruk, panne smeer en meel sif ons sal pantser teen die onsigbare vyand.
Piesangbrood is ons talisman teen vrees en onsekerheid, ’n soet gerusstelling in ‘n wêreld wat oornag sy bekendheid verloor het.
Piesangbrood eintlik ‘n nuwigheid:
Piesangbrood is nie iets wat ons oumagrootjies sou maak nie. Die koekbrood soos ons dit vandag ken het eers in die 1930’s werklik gewild begin raak, deel van ‘n genre van vinnige meelmengsels wat deur die kommersiele beskikbaarheid van rysmiddels soos bakpoeier aangegryp is deur huisvrouens.
Skielik was dit nie meer nodig om in te suur nie – vandaar die term vinnige broodjies. (Quick breads). Ek spoor wel ‘n resep vir Piesangkoek op in Mev van Tulleken se kookboek van 1923, wat met die roommetode gemaak word en versuikerde skil inkry. Ook nie Hildagonda Duckitt se boeke het ‘n resep vir ‘n piesangbrood nie. Vroeg in die 20ste eeu is piesangs ook merendeels net gebruik om bo-op koeke te sit. (Ek gee In my volgende blogskrywe ‘n resep vir ‘n onderstebo-piesangkoek.)
Sonder piesang om self te bak raak hierdie blogskrywe ‘n herlewing van al die piesangbrode wat ek in die sorgvryer jare gebak het. Al kan ek nie nou vriende oornooi om dit te geniet nie, bak en aflewer nie, kan ek my wenke en resepte deel:
*soos om bruinsuiker of streusel oor te strooi voor dit gebak word vir ekstra tekstuur en bakkersfinesse;
*en om een van die piesang net op te sny, eerder as om alles fyn te druk.
*en om ryp piesangs in die skil te vries vir die dag wanneer jy die piesangbroodkoors kry.
Maak piesangs so gouer ryp:
Hoe gemaak as die lus jou oorval en die piesangs in die vrugtebak loer vir jou met hul jong, groengeel skille aan – nie ‘n bruin kol in sig nie? Alhoewel almal dit maak met oorryp piesangs, is dit eintlik ‘n gebruik wat uit spaarsamigheid ontstaan het om vermorsing te voorkom. Dit is nie noodsaaklik vir piesangs om so ryp te wees nie. Dis wel makliker om fyn te maak, maar solank die piesang nie groen is nie, behoort jy goeie resultate met ‘n geelskil piesang te kry. As jy wel verkies, kan jy die piesangs op hierdie maniere vinniger ryp maak.:
- Plaas piesangs in ‘n bruinpapier- of plastieksak saam met ‘n ongeskilde tamatie, appel of peer. Die gasse wat vrygestel word laat die piesangs gouer ryp raak – dit sal 24 uur neem.
- Kan nie eers 24 uur wag nie? Pak die onryp piesangs op ‘n gevoerde bakplaat uit met genoeg spasie tussenin. Bak sowat 40 minute teen 150°C. Die skille sal heeltemal verkleur, maar die binnekant sal lekker sag en geurig wees.
Ekstra smaakskop en streusel:
- As jy wil kan jy ekstra geur aan piesangbrood gee met smaakmiddels soos kaneel, gemmer, vanielje- of amandelgeursel; okkerneute of pekanneute en selfs sultanas. Ek hou van die smaak van donker sjokolade en espresso saam met die piesang.
- ‘n Ander nuutjie is om piesangbrood ‘n streusel bo-kors te gee: ¼ koppie meel, 1/3 koppie ligte bruinsuiker (saamgedruk), 30 ml koue botter in blokkies, 1/3 koppie fyngekapte neute, 5 ml kaneel. Maak dan so: meng die meel en die bruinsuiker, Sny die botter in by die meel tot dit soos growwe broodkrummels lyk. Roer die neute en kaneel by en strooi oor die beslag in die pan voor dit gebak word.
Pronto-pronto piesangbrood met sjokolade-brokkies
Die mengmetode is die vinnigste en maklikste van enige wat ek al gemaak het (en min skottelgoed).
- 100 g sagte botter
- 175g strooisuiker
- 2 groot eiers
- 2-3 ryp piesangs (fyngemaak)
- 225 g bruismeel
- 5 ml bakpoeier
- 2 E melk
- 100 g donkersjokolade, grofgekap
- Bruinsuiker om oor te strooi.
Metode
- Voorverhit die oond tot 180C. Smeer ‘n broodpannetjie liggies uit en voer uit met bakpapier.
- Meet al die bestanddele af direk in die mengbak (buiten die sjokoladeblokkies) en klits vir 2 minute tot goed gemeng. Vou die sjokolade stukkies in.
- Skep in die voorbereide pan, maak die bokant van die beslag gelyk, strooi bruinsuiker oor en bak in die voorverhitte oond vir 1 uur tot goed uitgerys, gaar en goudbruin. Die beslag sal ‘n kraak bo-op maak, wat deel van die karakter van piesangbrood is.
- Laat 5 minute in die pan afkoel, lig uit en plaas op afkoelrak. Sit die ketel aan en geniet snye ongebotter met kof
MIddernag piesangbrood
Maak 1 brood
Met die donkersjokolade is die piesangbroodjie nie te soet nie, terwyl die volgraanmeel ‘n besondere tekstuur gee.
- 190 ml koekmeel
- 125 ml volgraanmeel
- 90 ml kakaopoeier
- 7 ml koeksoda
- 4 ml bakpoeier
- 5 ml sout
- 5 groot baie ryp piesangs, verdeel
- 280 ml ligbruin suiker
- 80 ml botter, kamertemperatuur
- 2 groot eiers
- 90 ml suurroom
- 5 ml vanielje-ekstrak
- 110 g donkersjokolade, gekap
- 15 ml bruinsuiker
Metode
- Voorverhit oond na 180°C. Spuit ‘n 24 cm x 11 cm broodpannetjie uit met kleefvrye kossproei. Voer die bodem uit met bakpapier met ‘n ruim oorhang aan die lang kante.
- Klits koekmeel, volgraanmeel, kakaopoeier, koeksoda, bakpoeier en sout in ‘n medium bak.
- Maak 4 van die piesangs fyn met vurk of aartappeldrukker.
- In ‘n groot mengbak klits die bruinsuiker en botter saam op matig-hoë spoed tot lig en donsig, sowat 4-5 minute. Klits die eiers een vir een by tot goed gemeng, terwyl jy dan en wan die kante skraap. Verminder die spoed en klits die suurroom, vanielje-ekstrak en piesangmoes by. Moenie skrik as die mengsel op hierdie stadium geskif lyk nie.
- Verminder die spoed en meng die droë bestanddele geleidelik by tot net deurgemeng. As jy te veel meng sal die koek taai wees. Vou die sjokoladebrokkies in.
- Skep die beslag in die voorbereide pan en maak bo-op gelyk. Sny die piesang in die lengte in 3 ewe dik snye. Plaas die piesangskywe bo-op met snykante na bo. Sprinkel die demararasuiker op die beslag, probeer die piesangs vermy.
- Bak koekbroodjie 65 – 75 minute tot ‘n toetspen wat jy in die middel druk, skoon uitkom; daar mag dalk gesmelte sjokolade vaskleef. Plaas die pan op ‘n draadrak en laat heeltemal afkoel voordat jy die piesangbrood aan die papieroorhang uitlig.
Olyfolie–piesangbrood met koffie en kaneel
Maak 2 brode
- 375 ml olyfolie of canola
- 500 ml koekmeel
- 500 ml volgraanmeel
- 5 ml sout
- 15 ml bakpoeier
- 2,5 ml koeksoda
- 10 ml kaneel, verdeel
- 2,5 ml neutmuskaat
- 3 ryp piesangs, fyngedruk
- 250 ml sterk gebroude koffie
- 5 ml vanillageursel
- 440 ml ligte bruinsuiker
- 4 eiers, kamertemperatuur
- Opsioneel: sesamsaad, kaneelsuiker en koffiepoeier, vir oorsprinkel
Metode
- Voorverhit oond na 180C. Smeer 2 broodpanne met olie en bestrooi met meel, skud oortollige meel uit of spuit goed met kleefvrye sproei.
- Klits die meel, sout, bakpoeier, koeksoda, kaneel en neutmuskaat saam in ‘n mengbak. Roer in ‘n aparte bak die koffie en vanillageursel by die piesang in tot behoorlik gemeng.
- Voeg die olie en suiker in die bak van ‘n staanmenger of gebruik ‘n groot mengbak en elektriese klitser. Klits teen lae spoed om goed te meng en klits dan die eiers een vir een by. Voeg die meel geleidelik, afgewissel deur die piesangmengsel by die eiermengsel. Moenie te veel klits nie.
- Verdeel die beslag tussen die broodpanne. Opsioneel: Strooi ‘n mengsel van bruinsuiker, kaneel, korrels kitskoffie en sesamsaad oor.
- Bak 45-55 minute tot die brood van die kante lostrek en ‘n toetspen skoon uitkom. Haal uit en laat 20 minute in die panne afkoel voor jy dit uitkeer op ‘n afkoelrak.
- Goed om te weet: Die koekbrood vries goed.
huiskok 