Tag Archives: druiwe

Wingerdkoek vir ‘n geluksgodin (ook bekend as Cleopatra-koek)

1 Jan

Ons het almal ‘n bietjie geluk aan ons kant nodig. Hoekom nie ‘n snytjie koek wat belofte inhou van voorspoed, geluk en oorvloed nie? Hier is ‘n koek wat ek opdra aan Abuntia, die Romeinse godin van oorvloed. Druiwe, wat dikwels in nuwejaarsvierings gebruik word om voorspoed te lok, skitter soos Robyne bo-op.

Dis eintlik bekend as Cleopatra-koek – die rede vir die naam bly ‘n raaisel. Majestieus is dit wel, maar nie juis mooi nie; daarvoor maak die oordadige druiwekroon op. Wat so interessant van die koek is, is dat ‘n suikerkors en die druiwe bo-op die beslag geplaas word eers nadat die koek 20 minute gebak het.

Die resep het oorspronklik as Vineyard-cake verskyn in die nou-gesneuwelde Gourmet-tydskrif, en is na Cleopatra-koek herdoop in Yotam Ottolenghi en Helen Goh se bakboek Sweet.

Nota: die koek word in ‘n tuitpan gebak (waarin suikerbrood of chiffonkoek gebak word).

Die oorspronklike resep vra vir gefortifiseerde Franse soetwyn Carte Or Muscat de Beaumes de Venise – ek het ‘n bottel plaaslike wit muskadel gebruik.

 

Wingerdkoek

Maak 12 snye                                                          

500 g koekmeel, plus ekstra vir oorsif

10 ml bakpoeier

2,5 ml koeksoda

4 ml sout

340 g strooisuiker

175 g sagte botter, plus ekstra vir smeer

75 ml fyn olyfolie

Fyngerasperde skil van 2 suurlemoene (10 ml)

Fyngerasperde skil van 1 lemoen (10 ml)

Uitgekrapte sade van ½ vanieljepeul

4 eiers

450 ml gefortifiseerde soetwyn soos wit muskadel of edel laatoes

100 g pitlose swart of rooi druiwe, gewas en in lengte deurgesny

Bolaag

70 sagte botter

70 g strooisuiker

100 g pitlose swartdruiwe, gewas en in lengte deurgesny

Maak so:

  1. Voorverhit oond tot 210°C. Smeer ‘n 25 cm (10 cm diep) chiffonkoekpan (tuitpan), bestrooi liggies met meel, skud oortollige meel af.
  2. Sif die meel, bakpoeier, koeksoda en sout saam in ‘n bak. Hou eenkant.
  3. Plaas suiker in die bak van ‘n staanmenger met die spaanhegsel aan. Voeg die botter, olyfolie, suurlemoenskil, lemoenskil en vanielje by en meng vir 2 minute op medium-hoë spoed tot glad en donsig.
  4. Voeg eiers beurtelings by, klits goed na elke byvoeging, verminder die spoed tot laag en voeg 1/3 van die meelmengsel en ½ van die wyn by; herhaal met nog ‘n 1/3 van die meel en die res van die wyn, en eindig met die laaste 1/3 van die meel terwyl jy dit steeds op lae spoed meng. Wanneer gemeng, giet in die koekpan en versprei 100 g druiwehelftes mooi eweredig bo-oor. Bak vir 20 minute.
  5. Terwyl die koek bak maak die bolaag: voeg die botter en suiker in ‘n bakkie en klop met ‘n houtlepel tot dit ‘n dik pasta vorm. Na die koek vir die 20 minute gebak haal die koek vinnig maar versigtig uit en skep klonte van die suikerpasta bo-op. Strooi 100 g druiwehelftes bo-op en plaas terug in die oond. Draai onmiddellik die temperatuur af na 180°C en bak 35-40 minute of tot ‘n toetsnaald skoon uitkom. Haal uit die oond, laat 30 minute afkoel voor dit uitgekeer word. Die koek kan dadelik geëet word of in ‘n lugdigte houer gelaat word.

Foto’s en stilering Errieda en Ian du Toit

Oes-af Kaaskoek met neute en ‘verskroeide druiwe’

21 Feb

Gee jouself  tyd het om die koek langsaam te bak, langsaam af te koel en langsaam te geniet.

Oesfees kaaskoek met tipsy sultanas in die vulsel, haselneut op die kors en druiwe in heuning en verjuicestroop

Oesfees kaaskoek met tipsy sultanas in die vulsel, haselneut op die kors en druiwe in heuning en verjuicestroop

Dis nou parstyd in die Durbanville Wynvallei waar ek woon. Dit gee my die idee om ‘n oesgebak te maak waar druiwe die kroon dra – ek doop dit Fees van die Druif Kaaskoek.  

Die resep is ‘n aanpassing van die  macadianeut- en heuningkaaskoek in my Huiskok Glanskok Kookboek.  In hierdie oesweergawe kom allerhande dinge in wat van die wingerdstok af kom:   In die romerige vulsel kom sultanas wat in verjuice gekook is. Dit verteenwoordig die vorige jaar se oes. Om  hierdie jaar se oes te herdenk word die kaaskoek versier met druiwekorrels wat in  heuning en verjuice karamelliseer – ‘n verwysing na die versengende hitte wat gewoonlik met parstyd te paard gaan.  Verjuice is ook ‘n produk van die druif (die groen, ongefermenteerde sap net nadat dit gepars is).  Die neute tussen die kors en vulsel  sorg vir kraak en tekstuur.

OES-AF KAASKOEK MET VERSKROEIDE DRUIWE

 Bestanddele

Kors:

20 ml strooisuiker

125 g gesoute botter

30 ml sonneblomolie

1 eier

500 ml koekmeel

10 ml bakpoeier

120 g geroosterde haselneute, grofgekap

30 ml heuning

Vulsel:

40 g sultanas

¼ k verjuice

375 ml strooisuiker

3 eiers

3 eiergele

750 g roomkaas of gladde maaskaas

100 ml mielieblom

45 ml suurlemoensap

375 ml vars room

‘Verskroeide druiwe’ versiering:

½ k heuning

¼ k verjuice

250 g pitlose rooi druiwe.

Metode

Kors:

Voorverhit die oond tot 150 °C. Smeer ’n diep ronde losboomkoekpan liggies.  Room die suiker, botter en olie saam. Voeg die eier by en meng goed. Sif die meel en bakpoeier saam en voeg dit by die eiermengsel. Meng tot ‘n stywe deeg. Druk die deeg stewig teen die bodem van die voorbereide koekpan vas.  Bak 5 min lank blind. Laat afkoel, sprinkel die gekapte neute oor die kors en drup die heuning oor.

Vulsel:

Kook die sultanas in die verjuice tot die vloeistof verdamp – so 5-6 minute. Hou eenkant.

Klits die suiker, eiers en eiergele saam tot dit dik en romerig is. Voeg die roomkaas, mielieblom en suurlemoensap by en meng goed. Voeg die gekookte sultanas en room by en klits liggies. Giet die mengsel versigtig op die gebakte kors. Bak 1 uur lank. Skakel die oond af, maak die oonddeur oop en laat die kaaskoek heeltemal afkoel. Bedek en plaas ten minste 2 ure, verkieslik oornag in die yskas.

Geskroeide druiwekorrels

Prut die heuning in ‘n pan oor matige hitte tot gekaramelliseer, terwyl jy die pan nou en dan swirl ( 3-4 minute), voeg die verjuice by en swirl om dit in te meng, gooi die druiwekorrels by en kook tot dit stroperig (5-7 minute).  Giet dit oor die afgekoelde kaaskoek.

Algemene Kaaskoekwenke

Bring die room en kaas eers tot kamertemparatuur. Dit maak die mengslag makliker.

Bak kaaskoek in ’n  waterbad en sit die oond af sodra die middel bykans geset is. Die kaaskoek moet stadig in die oond afkoel, met die oonddeur oop. Dan kraak dit nie sommer nie.
Daar bestaan nie iets soos ‘n kitskaaskoek nie. Sorg dat jy tyd het om die koek langsaam te bak, langsaam af te koel en langsaam te geniet

KAASKOEK WEETWAARDIGHEDE

 Kaaskoek se roem strek so ver terug as 8000 vC na die antieke Griekse eiland Samos toe elke Griekse provinsie met sy eie kaaskoek resep gespog het. ‘n Resep uit hierdie era lui: “Neem kaas, stamp dit en sit in ‘n sif.  Voeg heuning en meel by en verhit alles saam in een massa.”

Kaaskoek was die voorloper van die hedendaagse troukoek en Romeinse bruide het kaaskoek gebak vir die bruidegom se vriende.

Druiwepizza en ander oes-gebak

16 Mar

Ons vier die einde van parstyd – of ‘oesaf’ – soos die boere dit in die Durbanville kontrei noem. Wat uitstaan van oestyd,  of dit nou hier by ons is of Frankryk of Italië, daar’s altyd een of ander tradisionele gebak. Dink maar aan Kaapse mosbolletjies en Toskaanse druiwebrode.

As jy ’n ware oesaf-makietie wil beleef moet jy hierdie Woensdag 21 Maart  die Durbanville Wynvallei se Fees van die Druif bywoon wat druiwe in al sy fasette vier – van korrel tot mos.  Tot my RSG kookmaat – die glanskok Francois Ferreira gaan in aksie te sien wees met ‘n roosterkoek-kompetisie op  Nitida, een van die 11 plase wat deelneem.

Druiwepizza met parmasaan, kruie en heuning

DRUIWEPIZZA MET KRUIE, HEUNING EN PARMESAANSKAAFSELS

Lekker en mooi genoeg om saam met vonkelwyn te geniet.

500 g klaar brooddeeg (koop by supermark se bakafdeling)
4 teelepels loperige heuning (fynbosheuning gee ‘n heerlike geur)
’n paar takkies vars roosmaryn
’n paar skeute olyfolie
twee handevol druiwekorrels, verkieslik swart druiwe
50g parmesaan in skaafsels gesny

Bedien 4

Verhit die oond tot 200°C. Intussen stamp die roosmaryn fyn in ‘’n stamper en vysel, gooi ‘n bietjie olyfolie by en stamp  nog fyner. Sny die druiwe in die helfte en hou eenkant.

Sny die gekoopte deeg in 4 stukke. Rol die deeg baie dun uit en bak in die warm oond tot die deeg  plek-plek sulke blase maak en goudbruin is. Nou’t jy ’n baie lekker bros kors.  Smeer nou die basis met die fyngestampte roosmaryn en die kruierige olietjies wat in die stamper oorbly. Strooi die druiwekorrels oor, bedek met die parmasaanskaafsels en bedruip met die heuning. Sit dit dan net vinnig weer in die oond sodat die Parmasaan net-net begin smelt.

 

‘n Blaaskans in oestyd met  Italiaanse druiwekoek en ‘n glasie Meerendal natuurlike soetwyn

MARIO SE DRUIWEKOEK

Druiwekoeke is ‘n eeue-ou Toskaanse oestyd-tradisie. Hierdie resep van die Italiaans-gebore stersjef Mario Batali is so lekker dat dit in ons kookboek Huiskok Glanskok ingesluit is. Dis ’n lekker koek om laat-somer, vroegherfs te maak – en met koffie of soetwyn te geniet.   Maklik en mooi. Al versiering wat jy nodig het is ‘n takkie druiwe.        

3 eiers

250 ml suiker

75 ml botter, gesmelt

75 ml olyfolie

125 ml melk

500 ml koekmeel

fyn gerasperde skil van 1 lemoen

30 ml amaretto likeur

5 ml bakpoeier

500 ml druiwe, gehalveer en ontpit

ekstra druiwekorrels vir versiering
Voorverhit die oond tot 180 °C. Voer ’n ronde losboom koekpan met gesmeerde bakpapier uit.

Klop die eiers en suiker tot lig en donsig, sowat 3 minute lank. Voeg die botter, olyfolie en melk by. Vou die meel, lemoenskil, amaretto en bakpoeier by die mengsel. Roer die ontpitte druiwe by. Giet die mengsel in die voorbereide pan en bak 40 tot 50 minute tot goudbruin en ’n toetspen skoon uitkom. Laat die koek in die pan afkoel. Sit dit met die onderkant na bo voor, sif versiersuiker oor en sprinkel ‘n paar druiwekorrels oor.

Druif- en okkerneut oesbrood

DRUIWE EN OKKERNEUT OESBROOD

 Die platbrood is gemaak met swart Barbera druiwekorrels, ‘n Italiaanse druifsoort gepluk in  Altydgedacht se wingerd. Enige swart druiwe is geskik.  Bedien dit warm met brie. 

(maak 2 brode)

14 g kitsbrouersgis

170 g strooisuiker, plus ekstra teelepel

Knippie sout

350 g broodmeel

500 g swart druiwekorrels

85 g okkerneute

2 eetlepels olyfolie

1 eetlepel gekapte vars roosmaryn

Growwe seesout vir oorsprinkel

Meng die gis, ekstra suiker en ½ koppie warm water in ‘n bakkie en laat staan vir ongeveer 15 minute. Sif die meel, 110 g strooisuiker en ‘n knippie sout saam in ‘n groot mengbak.  Voeg die gismengsel, olyfolie en 45ml warm water by en meng goed. Knie die deeg vir ongeveer 5 minute en plaas in ‘n gesmeerde bak en bedek liggies met kleefplastiek, laat rys tot dubbel in volume. Voorverhit oond tot 180⁰C. Knie die deeg af en sny in 2 ewe groot dele. Vorm twee plat sirkels. Meng die druiwe, neute, roosmaryn en die res van die strooisuiker en plaas bo-op die deegsirkels. Bak vir 45-50 minute tot goudbruin. Besprinkel met growwe seesout en bedien die brood warm met brie of enige sagte ryp kaas.

{Fees van die Druif}

Die Durbanville Wynvallei se Fees van die Druif  word op die volgende 11 plase gehou op 21 Maart:

Nitida, Klein Roosboom, Hillcrest, Groot Phesantekraal (Phizante Kraal-wyne), Durbanville Hills, Diemersdal, De Grendel, D’Aria, Bloemendal en Altydgedacht. Loer in by www.durbanvillewine.co.za vir besonderhede.

{Dankie Samarie Smith wat altyd regstaan met die kamera as die druiwegebak uit die oond uit kom}

%d bloggers like this: