Sjokolade bruintjies is een van daai name wat net nie met dieselfde soet verleiding gelaai is as sy doopnaam chocolate brownies nie. Cupcake is nog so ‘n een, waar die woord kolwyntjie meer aan kleuterpartytjie. (Ons het ook ons eie Afrikaanse soetgoed wat homself net nie laat vertaal nie, soos ‘Hertzoggies’, koeksister en soetkoekies om ‘n paar te noem.

Bruintjies of brownies – wie het met hierdie schmoetserige, fudgerige, sjokoladebom koeklekkerte vorendag gekom?  Die eer kom ene Fanny Farmer van die VSA toe wat in 1905 haar sjokoladekoekie-resep omskep in ‘n stafie. Dis in 1906 opgeneem in The Boston Cooking School Cookbook.  Dit was met net een eier en ‘n karige paar blokkies sjokolade  veel minder dekadent as die ryk sjokolade en kakao-gegeurde bruintjies van vandag.

Volgens  kosgeskiedkundiges was dit ene Me. Maria Willet Howard, ‘n protégé van Fanny wat met ‘n ekstra eier en EKSTRA  sjokolade die deugsame soetgebak tot die anderkant van sonde laat draai het.

Fanny sou ook nie kon droom dat haar All American koekstafie later jare later ‘n hart van Turkse lekker sou kry nie! Dis die bydrae van my vriend Hannes Koegelenberg, grafiese kunstenaar en super-stilis.

DONKERSJOKOLADE ‘BROWNIES’
MET TURKSE LEKKERS

bestanddele

• 150g botter, plus ekstra vir smeer

• 200g goeie gehalte donkersjokolade, gekap

• 3 eiers

• 225g strooisuiker

• 5ml vanieljegeursel

• 75g koekmeel

• 30g kakaopoeier

• 5ml kits koffiepoeier

• 2,5ml soutvlokkies

• 150g grof gekapte Turkse lekkers

Opsioneel: frambose vir opdiening

metode

1. Voer ‘n vierkantige brownie-koekpan met bakpapier uit en smeer met botter. Voorverhit oond tot 180 °C.

2. Mikrogolf die botter en sjokolade 30 sekondes en roer deur, herhaal in sarsies tot gesmelt. Laat afkoel.

3. Klits eiers, strooisuiker en vanieljegeursel met elektriese menger tot lintstadium. Roer die gesmelte sjokolade- en bottermengsel geleidelik by met ‘n spatel.

4. Sif koekmeel, kakaopoeier en sout oor, voeg koffiepoeier en Turkse lekkers by en meng liggies by met ‘n spatel.

5. Giet die beslag in die voorbereide brownie-pan. Bak sowat 30-35 minute tot gestol en gaar, maar steeds klam. Laat oornag in die pan in die yskas afkoel. Sny in blokkies.

6. As jy wil bedien met vars frambose.