Sampioene op roosterbrood, Rugby-kyk en eet op jou skoot

16 Aug

Vandag se Sondagkosstorie is ‘n annerste storie, een wat eintlik nie vra vir oorvertel nie.

image

Dis ‘n geval van opgewarmde winkel-lasagne, raap-en-skraap snipper-tamatie- en kropslaaislaai. Die kleinskrif op die foeliebak beweer dit voed 4, my alie. Toe die aanwysings- baktyd verby is, bibber die winkel-homemade dis nog onder die dun, bleek, uitgewaste witsous-kombers. Ek gee nog 10 minute en draai die oond warmer, en hoop vir ‘n kleurtjie.

Om my gewete te stil kry die slap skeppe gekoopte lasagne ‘n ordentlike buurman van Portabellini sampioene op goeie brood.

 

Ma Inez, gewoond aan eksotiese Sondagreise uit my hand gee die spulletjie een kyk en dring aan op haar gewone winkelbrood-toebroodjies lig gesmeer met Rama of iets dergeliks erg. En ‘n Bakkie joghurt. Dit gee Annamie vir haar op Ma se skinkbord met haar Eie gehekelde groen lappie.

Want sien, ons eet nie aan tafel vandag nie. Ek kook nie, dek nie tafel nie, want Ma, Ian en Annamie kyk rugby. Eet op hulle skote voor die TV.

So gaan dit by Huiskok. Verkies jy eerder om etenstyd rugby te kyk en op jou skoot te eet, kry jy by my kamma-lasagne, en as jy gelukkig is ‘n sny goeie brood.

Ek wonder vlugtig wie speel téén wie, en gaan sit net buite die grense van hul luide cheers vir een of ander blink manoeuvre van hul span. Ek wonder waar my ma haar liefde vir die Heilige R gekry het, en waar ek myne verloor het.

image

Portabellini sampioene op goeie brood
Bedien 4

1 houer portobellini sampioene, halveer
30 ml botter
15 ml olie ( Ek hou van Olive Pride se saadolie-olyfolie versnit)
2 knoffelhuisies, gekneus
100 ml room, of suurroom
Sout, peper, neutmuskaat
Bediening: Goeie brood, sprinkel pietersielie, suurlemoenskyf

Metode
Verhit botter en olie in die pan tot dit sis, voeg knoffel by. Haal knoffel uit sodra dit goudbruin is. Braai die sampioene bruin, voeg room by, roer deur en geur. Skep op sny vars of geroosterde brood, strooi pietersielie oor en bedien met skyfie suurlemoen.

6 Responses to “Sampioene op roosterbrood, Rugby-kyk en eet op jou skoot”

  1. Liezel September 20, 2015 at 2:46 pm #

    Dis wonderlik om te weet dat daar minstens nog een mens in hierdie land soos ek is! Ek verstaan ook glad nie die houvas wat daardie Heilige R op almal rondom my het nie. Gelukkig dat ek die lemmetjie spaghetti resep kom soek het ander sou ek dit nooit geweet het nie. Mag ons die volgende paar weke oorleef in die wete dat daar wel hier en daar nog een is wat nie wil deel hê of meemaak aan dit wat almal so gaande het nie…

    • huiskok September 20, 2015 at 3:08 pm #

      Ons sal moedig die stryd stry. Lekker week vir jou.

  2. Estelle August 16, 2015 at 5:03 pm #

    Ha ha. So gaan dit in menige huise. Min van ons is braaf genoeg om te deel.

    • huiskok August 16, 2015 at 5:11 pm #

      afdag is ‘n goeie ding.

  3. kisscom2013 August 16, 2015 at 4:39 pm #

    Lyk lekker. Ek gaan dit beslis maak. Dankie.

    • huiskok August 16, 2015 at 5:58 pm #

      Sampioene moet mens nie mee te veel lol nie.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: