Kaasburger Cabriolet (burger met ‘n afslaandak)

24 Feb

Ek bieg. As dit by hamburgers kom, staan ek voor in die ry by Steers. Dis vir my bekroonde kitskos, want as ek die dag hamburger eet, wil ek liefs nie self agter die stoof staan nie. Vol wenke, voorwaardes, heilighede en “so-moet-jy-maak” is ek nie: daarvoor moet mens by die Amerikaners gaan inloer.

Cabriolet – die topless kaasburger

Tog is gourmet hamburgers deesdae sulke hoogmode dat mens gerus maar met nuwe oë daarna kan kyk.  Daar is selfs ‘n trendy ‘hamburger joint’ in Kaapstad wat behoorlik ‘n kultus-aanhang het. Die plek se naam is The Dog’s Bollocks – en dis so weggesteek in ‘n stegie Roodehekstraat uit Buitenkantstraat dat jy maar agter die lekker vleisreuke moet aanloop om dit te kry. Hier word net 30 burgers ‘n aand gemaak met interessante souse soos Mexikaanse sjokolade molé (ryk, diep rissie-en speserysous met donker sjokolade).

As ek wel die dag ‘n burger by die huis maak verkies ek beesvleis…. die maalvleis nie te fyn gemaal nie, en nie te maer nie, want dan droog die pattie uit en is minder geurig.  As die vleis te vet is, kook te veel vet weer uit tydens die gaarmaak wat die vleiskoekie laat krimp en taai maak. Topside snit word as die beste gereken. En vir ‘n gesonder weergawe kan volstruismaalvleis ook gebruik word – gebruik dan  2/3 volstruis en 1/3 bees.

Oor die brood het ek ook nie eintlik geite nie (ander sweer by sagte rolletjies met sesamsaadjies bo-op). En net omdat tradisie sê ‘n hamburger is vleis met brood aan weerskante, beteken nie dat dit soms maar dakloos voorgesit word nie.

Ek noem hierdie  oopgesig hamburger met kaas, taktamaties en romerige sampioene op ciabatta van sommer ‘n Kaasburger Cabriolet. (As jy ‘n ‘skinny’ weergawe soek, braai net die sampioene bruin in bietjie olyfolie en los die room – maar die kaas is nie onderhandelbaar nie – goeie, verouderde cheddar of gouda met karakter en pedigree).

Kaasburger Cabriolet

Bedien 6

800g bees-maalvleis of ‘n mengsel van 500 g volstruis/300 g bees

1 t fyn koljander

1 t fyn komyn

1 ui, grof gerasper

2 T vars koljander, gekap

2 T vars pietersielie, gekap

paar druppels Worcestershire sous

5 ml wynasyn

2 T olyfolie

Romerige sampioene:

1 T botter

2-3 groot bruin sampioene, gesny

1ui, fyngekap

1 knoffelhuisie, fyngekap

1 t koekmeel

1 koppie laevet room

sout en peper na smaak

6 snye ciabatta

1 koppie gerasperde Simonsberg verouderde gouda of cheddar

kersietamaties op die tak (6 per persoon)

Slaaiblare

Meng die maalvleis, fyn koljander, komyn, gerasperde uie, pietersielie, vars koljander, Worcestershire sous en asyn goed saam. Wenk: moenie die vleis te veel hanteer nie. Verdeel dit in 6 porsies en vorm die vleiskoekies. Verhit olyfolie in ‘n pan en braai die vleiskoekies  2-3 minute aan elke kant to medium gaar.

Verhit die botter in ‘n pan, en voeg die sampioene, uie en knoffel by. Kook ‘n paar minute en voeg die meel en room by – en kook nog ‘n paar minute tot die sous verdik. Geur met sout en peper.

Plaas ‘n hopie kaas op elke burger en plaas onder die gloeiende roosterelement om te smelt. Rooster die ciabatta en bedek elke sny met ‘n skeppie sampioensous, slaaiblare, vleiskoekie met die gesmelte kaas en rond af met die taktamaties.

As jy jou middellyf dophou, vervang die romerige sampioene met sampioen in bietjie olyfolie gebraai.

*Dankie aan Simonsberg vir gebruik van foto en basis-resep. Vir verdere lekker idees met kaas besoek www.Simonberg.co.za

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: